Azken hilabeteetan ematen ari den enplegu suntsiketa geratzeko eta enplegua duintzeko, indarrak batu eta harresi sindikal eta sozial bat sortzearen beharra planteatu genuen urtarrilean. Sindikatuekin erronda bat egin dugu gure gogoetak konpartitzeko, eta, sindikatu bakoitzak estrategia desberdina duela agerian geratu arren, LABek sustatutako hausnarketa emaitza ematen ari dela jakinarazi dute sindikatuko idazkari nagusi Garbiñe Aranburuk eta Negoziazio Kolektiboko eta Ekintza Sindikaleko idazkari Xabier Ugartemendiak, Bilbon egindako agerraldian.
Hain zuzen ere, langileek LABen mezua oso ongi ulertu dute, eta, siglen gainetik, enpleguaren defentsan borroka egitea ezinbestekoa dela eta borroka ez dela bakoitzaren lantokian hasi eta bukatzen iritzi dute: “Langile elkartasunaren garrantzia zein den oso ondo barneratua dute”.
Enpleguaren alde mobilizazio ugari ari dira gauzatzen. Formato desberdinetan egin badira ere, guztietan jendearen erantzuna itzela izan da. Garbiñe Aranbururen hitzetan, “oraingo eta etorkizuneko enplegua defendatu behar da. Orain borrokan dauden langile horiei babesa eman behar zaie. Enpresa zein sektoreetako borroka horiek dimentsio sozial bat izan behar dute eta eremuz eremu egiten diren borroka horiek dinamika herritarrekin lagundu behar dira, horretarako mobilizazio diseinuak eginez”.
Hala, idazkari nagusiak azken asteetan mobilizazio eredu desberdinak izan direla azaldu du, “eta guztiak dira balekoak LABentzat”.
Gasteizen urtarrilaren 30ean egindako manifestazio bateratua ekarri du gogora, hainbat enpresa batzordetatik deituta; Aiaraldean egindako mobilizazio eguna, euskal gehiengo sindikalaren parte hartze aktiboarekin; eta ITPko langileek Barakaldon egindako mobilizazio jendetsua, besteak beste.
Bestelako deialdi batzuk lantzen ari dira, eta, sindikatuok apirilaren 22rako sektore publiko guztian deituta dugun greba adibide, badaude ere abian diren beste borroka batzuk.
“Egin dugun gogoeta emaitzak ematen ari da. Sindikatuen arteko desadostasunen gainetik, enpleguaren defentsan erantzuna artikulatzen ari da”, berretsi du Garbiñe Aranburuk.
Madrilera begiratu gabe
Idazkari nagusiaren hitzetan, “Madrilera gutxiago begiratu eta arreta gehiago jarri behar dugu Euskal Herrian. Hemen, bestelako errealitate sindikal eta sozial bat dugu, bestelako indar bat patronalaren asmoei aurre egiteko. CONFEBASK eta CEN patronalei mezu argi bat bidaltzen ari gara: badituzte bitarteko legalak langileak oso erraz kaleratzeko, baina ezin izango dituzte erreforma horiek baliatu”.
Zentzu honetan, lantokietan horrela jokatzen ari gara eta jokatuko dugu:
-Enplegu Erregulazioko Espedienteak (EEE) aurkezten ari diren enpresetan, borroka eredugarriak martxan jartzen ari dira. Hainbat kasutan EEEa akordio gabe amaitzen da, sindikatuok ez gaudelako prest azken urteetan irabaziak eta dibidendo banaketak izan dituzten enpresei kaleratzeak errazteko. ITP, Aernnova, Tubacex eta Gestamp dira kasu batzuk.
Akordiorik gabe EEEa amaitu eta kaleratzeak gauzatuz gero, epaitegietan lanpostu horiek defendatuko ditugu, baita mobilizazioen bitartez ere, enpresek oso argi izan behar dutelako ez dugula kaleratzerik onartuko.
-Aldi Baterako Erregulazioko Espedienteak (ABEE) aurkezten dituztenean, berriz, enplegua bermatzeko neurriak adostuko ditugu. ABEEra jo nahi duen enpresa orok enpleguari eusteko konpromiso argia adierazi behar du.
Hala ere, enplegu suntsiketa ez dela enpresa industrial handietan bakarrik ematen zehaztu du Garbiñe Aranburuk, ezarri den lan harreman ereduak oso enplegu hauskorra sortu duelako, gazteak eta emakumeak kaltetzen dituena batez ere.
Sektore horietan ere ari gara borrokak sustatzen eta artikulatzen.
Azken finean, LABek jarraituko du enplegu suntsiketa geratu eta enplegua duintzeko borrokan eta enpleguaren alde dauden mobilizazio mota desberdinetan parte hartzen. “Behetik gora sortzen ari gara erantzuna, eskualdez eskualde, herriz herri, ari da enpleguaren aldeko harresi sindikal eta sozial hori sortzen”, erantsi du idazkari nagusiak.
